Anëtari i Bordit të Fondit të Kursimeve Pensionale (Trusti), Driton Qehaja ka thënë se janë tërhequr 500 milionë euro, si pasojë e rrezikut në tregjet ndërkombëtare.
Qehaja duke raportuar në Komisionin për Buxhet, Punë dhe Transfere theksoi se kjo tërheqje është bërë me arsyetimin e pritjes së një momenti më të mirë në bursa.
“Këtë vit çka kemi bërë për me e ul rrezikun, kemi diku rreth 500 milionë euro të tërhequra, i kemi para kesh, të tërhequra nga rreziku, nga tregjet ndërkombëtare dhe presim një moment të mirë për të investuar”, tha Qehaja.
Në këtë mbledhje, deputeti i Partisë Demokratike të Kosovës, Ferat Shala ka kërkuar llogaridhënie për humbjet e kursimeve në Trust.
“Ku është fondi i Trustit në tregun e brendshëm? Ne kemi nevojë t’i shfrytëzojmë resurset duke i ngritur kapacitetet e brendshme që do të kishte më shumë siguri. Ndërsa, kur i shohim në total, kemi investuar në shumë kontinente dhe shtete 77 për qind të aksioneve. Pastaj, kisha pasur dëshirë me ditë sa kemi humbur në vitin e fundit aksione, ose sa milionë euro ka humbur fondi për shkak të krizës së investimeve jashtë vendit”, tha Shala.
Kryesuesi i Bordit të Trustit, Ruzhdi Morina ka thënë se ka një rënie të vlerës së investimeve 5 deri 6 për qind si rrjedhojë e krizës financiare në tregjet ndërkombëtare.
“E para, nuk ka humbje. Është mirë ta sqarojmë këtë termë. Në këtë kohë është një lëvizje e vazhdueshme që ndodh në vlerën e aksioneve, ai ndryshon çdo ditë është një çmim ndryshe. Për humbje mund të flasim vetëm atëherë kur ai aksion realizohet. Për momentin kemi lëvizje të ndryshme të çmimit të njësisë. Në vitin 2021, kemi pasur plus 227 milionë euro kthim pozitiv, ndërsa këtë vit mund të kemi një performancë tjetër, ta shohim se si do të mbyllet viti. Ky vit nuk është sfidues vetëm për neve, është besoj për të gjithë botën. Ne jemi duke u munduar të reagojmë drejt dhe arsyeshëm. Po, aktualisht ka një rënie të vlerës së çmimit të njësisë, janë pak e shumë ato që janë raportuar në media. Është tejet relative, ka qenë 5 deri 6 për qind, kështu që ndryshon çdo ditë”, tha Morina.
